Eng Rees vum Nirgendland zu engem Neu-seh-land, 2. Deel
Eng spirituell Online-Reesbegleedung vum a mam Jean Leyder
No der éischter Hallschent vun der spiritueller Rees vum Jean Leyder geet et lo mam 2. Deel weider. Wéi gewinnt, verëffentleche mir hei all Méindeg eng nei Wegmarke mat engem Video, deen dozou gehéiert.
Wegmarke 6: Vum 7. Abrëll un!
Jean Leyder, Initiator an éischten Direkter vun der Erwuessebildung
Dir sidd nei a wëllt lo nach gären „matreesen“? Kee Problem. Hei nach emol fir all d’Leit, déi nei derbäi sinn…
Em wat geet et: De Jean Leyder, Grënner vun der EwB, huet Enn Dezember 2024 säin 90. Gebuertsdag gefeiert. Dëst huet hien dozou inspiréiert, nach eng Kéier ee grousse Projet mat eis gemeinsam unzegoen. Scho laang beschäftegt hien sech mat der Fro, wéi hautzudaags, an Zäite vun enger ëmmer weider zouhuelender Digitaliséierung an Individualiséierung, Spiritualitéit a Gemeinschaft ka gelieft ginn. Seng Iddi: eng spirituell Rees un där een iwwer Internet deelhuele kann – ganz egal, wou een sech grad befënnt.
Iwwert en Zäitraum vun insgesamt zéng Woche gëtt all Méindeg en neien Impulstext (eng „Wegmarke“) mat engem dozougehéierege Video online gesat. Et handelt sech dobäi ëm „Sprechversuche ins Offene“ – en explizit reliéisen Deitungskader spillt dobäi keng Roll.
